სამართალდამცველებმა ბათუმის აეროპორტში 11 კილოგრამზე მეტი მარიხუანა ამოიღეს
20.09.2022
უკან დაბრუნება
სამართალდამცველებმა ბათუმის აეროპორტში 11 კილოგრამზე მეტი მარიხუანა ამოიღეს. შინაგან საქმეთა სამინისტროს ცენტრალური კრიმინალური პოლიციის დეპარტამენტის და ფინანსთა სამინისტროს შემოსავლების სამსახურის საბაჟო დეპარტამენტის თანამშრომლებმა, ერთობლივად ჩატარებული ღონისძიებისა და საგამოძიებო მოქმედებების შედეგად, 1985 წელს დაბადებული უცხო ქვეყნის მოქალაქე ბათუმის საერთაშორისო აეროპორტში დააკავეს.
მას ბრალი განსაკუთრებით დიდი ოდენობით მარიხუანის უკანონო შეძენა-შენახვა-გადაზიდვასა და განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანაში ედება. გამოძიებით დადგინდა, რომ დაკავებულმა საქართველოში ნარკოტიკული საშუალება სამხრეთ აფრიკის რესპუბლიკიდან შემოიტანა.
დანაშაულები 15-დან 20 წლამდე ან უვადო თავისუფლების აღკვეთას ითვალისწინებს.
